 |
| मुख्यमंत्री सहायता निधीमध्ये जमा करण्यासाठी निधी संकलित करताना जेवळी येथील युवक |
प्रतिनिधी / लोहारा
तालुक्यातील जेवळी येथील युवकांनी सामाजिक बांधिलकी जपत घरोघरी जाऊन व गावात मदतफेरी काढून जमा केलेले एकावन्न हजार रुपये मंगळवारी ( दि. ५) मुख्यमंत्री सहायता निधीत जमा केले आहेत.
सध्या कोरोनामुळे अनेक अडचणी निर्माण झाल्या आहेत. या अडचणीच्या काळात अनेकजण आपल्या परीने जी मदत करता येईल ती मदत करण्याचा प्रयत्न करत आहेत. कोणी अडचणीत असलेल्या व्यक्तींना जीवनावश्यक वस्तूंच्या किटचे वितरण करत आहेत तर कोणी मुख्यमंत्री सहायता निधीत रक्कम जमा करत आहेत.
१९९३ साली झालेल्या महाप्रलयंकारी भूकंपात जेवळी हे गाव उध्वस्त झाले होते. यावेळी गावाचे मोठ्या प्रमाणात नुकसान झाले होते. त्यानंतर शासनाकडून गावचे नवीन ठिकाणी पुनर्वसन केले. यावेळी देशाबरोबरच परदेशातून मोठी भरीव मदतही आली होती. यामुळे समाजाचे ऋण म्हणून येथील नागरिक अन्य ठिकाणी झालेल्या नैसर्गिक आपत्ती वेळी आपल्या परीने मदतीसाठी पुढाकार घेतात. मागील काही दिवसांपासून कोरोनाच्या संकटामुळे सर्वत्र भीषण परिस्थिती निर्माण झाली आहे. कोरोनाचा प्रादुर्भाव रोखण्यासाठी शासनाने लॉकडाऊन जाहीर केले आहे. त्यामुळे राज्याच्या तिजोरीवर मोठा भार पडत आहे. त्यामुळे आपल्या परीने शासनाच्या मदतीसाठी काही तरी करूया या विचाराने जेवळी येथील युवक एकत्र येत रक्कम जमा करून मुख्यमंत्री सहायता निधीमध्ये जमा करण्याचा निश्चय केला. त्यानुसार या युवकांनी प्रत्येक घरी जाऊन व गावात मदतफेरी काढून नागरिकाकडून जमेल तेवढी मदत स्विकारत पाच दिवसात ५१ हजार रुपये जमविले. यावेळी युवकांचा उपक्रम पाहून नागरिकांनीही सढळ हाताने मदत केली. यात येथील सरपंच व ग्रामपंचायतच्या सर्व सदस्यांनीही एक महिन्याचे मानधन स्वरूपात एकूण आठ हजार रुपये जमा केले. मंगळवारी (दि. ५) उमरगा येथील उमरगा जनता बँकेतून मुख्यमंत्री सहाय्यता निधीच्या खात्यावर ५१ हजार ५५१ रुपये जमा केले आहेत. सामाजिक बांधिलकीतून युवकांनी केलेल्या या मदतीचे सर्वत्र कौतुक होत आहे.
या उपक्रमासाठी मेघराज कारभारी, गुणवंत भैरप्पा, राहुल कारभारी, महेश सारणे, अर्जुन कारभारी, प्रशांत दंडगुले, बालाजी भैराप्पा, अभिजीत वर्दे, वैभव देसाई आदी युवकांनी पुढाकार घेतला.
No comments:
Post a Comment